|
SubscriptionsSites I Read
|
|
|
|
| 17號呢日都好忙, 下午睇完赤壁之後就趕去expo睇x japan了. 去到會場, 我同豆腐人即刻買紀念品, 我買左2年tee + 1個環保袋 + 1個cardholder, 埋單盛惠 $710. 呢晚簡直係我畢生難忘, 我夠膽話係我一生人睇既演唱會入面最正最好睇既一晚. 今晚我坐得好近呀, 係個台側邊, 超前呀! 雖然同尋晚一樣遲左40分鐘先開波, 但氣氛就比尋晚高漲100倍呀. 豆腐人買左2支螢光棒比我整個x logo出黎, 多謝豆腐人. 尋晚好明顯係留力, 因為今晚佢地既演出係落力好多. 其中heath solo 果陣仲走左落台彈, 好羨慕d 人呀, 有得摸佢支結他同埋同佢擊掌, 不過我超近距離見到佢都已經好開心了. 期間佢地唱左d 尋晚冇唱既歌, 令成個演唱會唔同晒. 係encore 時段超感動, 因為heath 就黎生日, 我地成個場d人一路唱生日歌比佢聽一路等佢地出返黎, 到佢地出返黎果一刻, heath 見我地唱住生日歌佢好感動, 不斷各我地鞠躬答謝, 而yoshiki 仲即刻彈起生日歌添, heath 即刻跪地答謝, 果個場面超touching, 而一向唔出聲既佢亦用廣東話講左一句多謝添. 最深刻除左生日歌果段之外, 就係比yoshiki顏射, 但唔好諗錯隔離. 今晚唱organsm時, yoshiki 終於玩滅火筒了, 因為我係台隔離, 所以yoshiki一定會經過我身邊的, 就係咁我比yoshiki (用滅火筒)顏謝了, 哈哈……..不過d 煙一陣味, 好難聞. 由於佢會跑返轉頭, 所以比佢顏射左2次, 哈哈……. 今晚玩x jump 特別high, 因為好近距離, 同埋周圍既人都好high, 所以感覺好正. 之後yoshiki 玩art of life, 佢真係勁. Drum solo 打完一次走去彈琴, 跟住又打過, 又彈琴, 係咁重複左幾次, 連後尾佢都頂唔順話你地真係想殺死我, 好x 累呀, 哈哈…..但佢真係好勁, 好癲, 臨尾仲拆埋d 鼓, 又成個飛身插水落d 鼓度去完成成個演出, 好博命呢. 最後佢地出黎謝幕, toshi 同heath 都有拋簽名波波呀, 我爭d 搶到架, 可惜有個波飛左入台底, 想叫d 食蕉拎到拎唔到, 唉…………. 不過都好啦, 可以咁近去睇佢地既演出, 我其中一個既夢想都已經實現左了…….. 唔知點解睇完今次演唱會之後冇乜唔捨得既感覺, 以前睇beyond 都會好唔捨得的. 後尾我發覺原來我今次係完全超enjoy 個show, 佢地既盡力演出帶比我滿足感, 所以我冇遺憾既感覺, 相反係完全融入左佢地添, 就好似肚餓果陣食左一頓好豐富既大餐一樣, 好滿足, 多謝你地 – X JAPAN !!! 後記: 今次真係要多謝幾個人, 第一係豆腐人, 因為佢肯陪我睇晒2場, 而16號果場佢仲係咁趕公司d 野, 希望唔會遲入場, 真係要多謝佢. 另外, 佢亦比我感染左都like X JAPAN了, 雖然佢唔係好似我咁鍾意, 但已經好有進步了, 因為佢一向都唔like band sound 的. 仲有, 佢比yoshiki 吸引住呢, 嘻嘻…..第二就係angel, 因為冇佢既話我冇可能買到咁前既飛. 第三就係dominic, 多謝佢讓個cardholder比我. | | |
| 16號果日, 我等左好耐既 X JAPAN 演唱會終於開波啦. 由於呢場係換飛, 所以個位置唔算坐得好好, 不過都已經令我血脈沸騰了. 放工之後即刻同豆腐人搭車去會場, 去到都已經8點了, 所以買唔到紀念品, 唔緊要丫, 因為我都睇埋17號的, 所以我唔急. 入到去已經感受到果種氣氛, 大家都好期待演唱會既開始. 雖然大約遲左40分鐘先開場, 但都冇減我地既熱情. 一開始大家狂叫, 我以為佢會用rusty nail 做opening, 點知竟然係用last song開波, 真係估yoshiki 唔到, 哈哈…..雖然toshi有d走音, 但個feel好好呀. 完左一段last song 之後就黎料, 冇錯, 係rusty nail, 大家即刻high 爆. 之後都唱左好多好經典既歌, 好似weekend呀, drain呀, endless rain等等……不過最勁我覺得係art of life, yoshiki 打鼓真係打到虛脫咁滯. 我幾驚佢打到咁勁第二日開唔到show呀! 之後orgasm佢冇玩滅火筒, 呢個係我意料之外既, 因為佢之次都有玩的. 期間pata有solo呀, 呢位阿叔彈結他真係好好聽. 呢晚氣氛都好好, 但我冇影相, 因為坐得都唔算近, 影出黎都冇用, 所以留返聽日先慢慢影, 哈哈……… | | |
| 2008年12月25日係我一生人裡面最重要既日子, 為左呢一日, 我又係訓得唔好, 因為太過緊張了. 仲有, 為左呢一日, 我欠落好多人情, 雖然已經請人食左飯答謝佢地, 但始終人情呢樣野係唔可能用物質去償還的. 所以, 日後如果有野幫到手, 我一定會盡力幫忙去答謝呢2位重要既人. 講返轉頭, 呢一日其實係我向豆腐人求婚既日子. 之前已經搵左朋友幫我買左粒勁靚鑽石, 真係要多謝佢. 好彩識佢搵人買咋, 如果出去買起碼要比多一個double呀, 所以抵我請佢食左2次飯既. 戒指搞掂, 咁點樣求婚先係最好呢? 咁岩25號約左豆腐人同佢d朋友bbq, 我就contact左佢其中一個朋友幫手, 叫佢幫我買家紮花, 放入袋, 扮晒係bbq果陣要抽既禮物. 初時其他人見到咁大份野係咁問佢個fd係乜黎, 果一刻我幾驚穿煲呀, 好彩都冇事. 去到薰衣草園, 我地扮晒抽禮物, 為左要令豆腐人一定揀中呢個朋友既禮物, 我地預先夾定叫佢個朋友整定2個抽獎袋, 同埋一定要豆腐人抽先. 果然按原定計劃行事, 豆腐人果日咁岩又唔舒服, 所以我叫佢d 朋友比佢抽先都冇人有異議, 真係天助我也. 當佢抽完號碼, 佢個朋友叫佢合埋眼先, 跟住我即刻係佢個朋友個袋度拎紮花出黎, 再拎埋戒指跪左係佢隔離. 當佢睜開眼之後成個人呆左, 跟住我就叫佢嫁比我啦. 但因為太突然, 佢唔識反應. 等左一陣仲反問返我 : 你講真架? 我果陣都比佢嚇左一嚇, 以為佢唔肯 (因為我一心諗佢佢會應承的, 所以完全冇準備過如果佢唔肯既話要點做). 跟住我就叫佢d 朋友起哄幫下手, 最後佢就答應左我喇, 哈哈..... 果日真係超順利, 連佢d 朋友都嚇左一跳, 同埋好surprise, 因為估唔到我會christmas求婚呢. 不過最重要係豆腐人都估唔到. 豆腐人曾經同我講過, 如果我求婚既話千祈唔好比佢估到, 所以我好難先整到呢個plan出黎. 事後佢同我講話原本估我24號求婚的, 因為之前果幾日我同佢個fd 夾定果陣佢聽到少少我地既對話. 但後尾見我24號冇行動, 所以就冇理到了. 不過佢就點都估唔到之後果日就係比到佢好大驚喜囉. | | |
| 唉, 呢排精神上真係受盡折磨...... 諗住叫多d人買 X JAPAN 既飛, 點知一d意外買多左, 搞到我要賣返出去. 頭兩日完全冇人問過價, 我已經好鬼驚. 都好, 過左兩日開始多人問, 咁我都冇咁驚. 原本有一日係一次過會賣晒d飛, 點知有條友突然又話唔買, 頂佢, 最衰係當我諗住賣得晒飛d果陣我cancel 左yahoo 個bid, 條友突然唔買我又要重新整過個bid, 又要再比bid charge. 最慘係呢一個係一個唔好既預兆嘛, 未交收就已經搞d 咁既野. 好彩, 之後果日2個交收都好順利, 而淨返d飛後尾亦有人話要, 交收順利, 我終於有覺好訓. 後尾我發現, 突然之間大把人係yahoo auction留言話想幫我買, 有d仲話出高價, 究竟咩料呀, 唔通真係瘦田冇人耕, 耕開有人爭? 為左賣飛d野我呢排真係冇覺好訓呀, 成日失眠, 仲要發夢都要發返賣飛既野, 下次真係唔好搞了.... | | |
| 生平第一次朝早去排隊買飛, 點知第一次就乃野.... 原本托左人買 X JAPAN 既飛, 但為左有咩意外, 自己都好早去左排隊, 仲要鬼死咁凍. 到我買果陣, 我已經特登check下朋友有冇幫我買到, d人話冇, 所以我自己買啦. 點知之後我發現原來佢幫我買左.....oh my god!!!! 我要咁多張飛做乜呀? 而家放又放唔到, 大佬, 成幾千蚊呀果度, 好灰............. 希望之後有人會買吧......... 今次有排都唔洗訓了. 如果真係賣唔到, 惟有減價啦, 唉........ 已經窮架喇, 仲要咁玩我?! | | |
|
